काठमाडौं– बलात्कारपछि हत्या भएकी निर्मला पन्तका दोषीलाई पत्ता लगाइ कारबाही गर्न प्रधानमन्त्री शेरबहादुर देउवाले निर्देशन दिएका छन् ।

आइतबार प्रधानमन्त्रीको सरकारी निवास बालुवाटारमा गृहमन्त्री बालकृष्ण खाँण र प्रहरी महानिरीक्षक (आईजीपी) शैलेश थापालाई बोलाएर निर्मला पन्तका हत्यारा पत्ता लगाइ कारबाही गर्न निर्देशन दिएका हुन् ।

प्रधानमन्त्री देउवाले निर्मलाको हत्या भएको तीन वर्ष पुगेको दिन आइतबार गृहमन्त्री खाँण र आईजीपी थापालाई बालुवाटारमा बोलाएर पन्त हत्यासँग सम्बन्धित अहिलेसम्मको अनुसन्धानबारे जानकारी पनि लिएका छन् । उनले जतिसक्दो चाडै दोषी पत्ता लगाएर कारबाही गर्न निर्देशन समेत दिएको प्रधानमन्त्री देउवाको सचिवालयले जनाएको छ ।

आइतबार मात्रै निर्मलाका आफन्तजनले कञ्चनपुरमा हत्यारा पत्ता लगाउन माग गर्दै प्रमुख जिल्ला अधिकारीमार्फत प्रधानमन्त्री र गृहमन्त्रीलाई ज्ञापनपत्र पनि बुझाएका छन् ।

निर्मला पन्तको २०७५ साउन १० गते बलात्कारपछि हत्या भएको थियो । भीमदत्त नगरपालिका–१८ निम्बुखेडास्थित साथीको घरमा गएको अवस्थामा दोस्रो दिन उखुबारीमा शव भेटिएको थियो ।